Sekse Skøyteamfi

Gratulera med flott innsats !

IMG_1402
Kanskje ei blivande stjerne her

Kveld etter kveld har grendafolk stått og sprøyta vatn på idrettsplassen på Sekse. I dag skal isen prøvast.

Kvaliteten på bildene er dårleg, men innsatsen til dei små var desto meir imponerande. Fyrste skøytetaka for mange små. Knall og fall, latter og gråt,  men opp att like blide.

IMG_1404
Lagledarbenken

På lagledarbenken vankar gode råd og trøyst. Litt varmande på termosen. Det er ei glød og driv i Seksekrinsen som er imponerande. Folk stiller opp i mange samanhengar. Litt høgre oppe i bygget, i bygde sitt rom sat mange ivrige damer i «strikkekafeen». Ja kanskje spøta dei skøytehuer til dei unge på isen. Forstod det slik at banen var døypt til «Sekse Skøyteamfi»

Me kan vera stolte av at ein av  «våre»  no er ein skøyteløpar i norgestoppen i sin klasse og han tok sine fyrste famlande skøytetak her.

Is på torsdag kveld!!!

Jon Sekse lagar is på skuleplassen på Sekse.
Jon Sekse lagar is på skuleplassen på Sekse.

Ikkje før kom kuldegradene, så var dei der. Føykingane. I fleire timar har dei i ettermiddag og kveld, stått på skift og sprøytt vatn på skuleplassen.

Då me var der, var det Jon Sekse som tok ei økt. Etter han skulle det koma ein ny. Så skal det få klaka skikkeleg godt i natt, før dei tek nokon tørnar på morgonkvisten.

Og med ei skikkeleg kveldsøkt i morgon, og ei ny kald natt, vil det svært truleg vera klart for å snøra på seg skeissene torsdag.

Dersom vermeldinga held stikk, skal det i alle fall vera blå grader til og med sundag.

 

 

Grannaveitla og nytt kjøken

grannatunLaurdag er det både Grannaveitla og innviing av flunkande nytt kjøken i Grannatun. Eit kjempearbeid er på nytt lagt ned.

Av Johannes H. Sekse

Redaktøren startar denne artikkelen med å seia seg lei for at han heller ikkje i år kan møta på Grannaveitlo.

Sidan den i år også skal kombinera festen med innviing av det nye kjøkenet, vil eg med dette bidra med noko. Nemleg nokre historiske glimt gjennom soga til det vel 83 år gamle, staselege huset vårt. Hald fram med å lese «Grannaveitla og nytt kjøken»

Godt humør i eldrelaget

Godt humør rndt bordet. Her er plass til fleire.
Godt humør rundt bordet. Her er plass til fleire.

Ein gong i månaden møtest dei. Medlemmene i Børve, Sekse og Espe eldrelag. I ettermiddag er det årsmøte.

Av Johannes H. Sekse

Føremålet til Børve, Sekse og Espe eldrelag er å skipa til trivelege samvær for dei som bur i og/eller er knytt til det som var Sekse skulekrins. På ymse måtar skal dei fremja medlemmene sine sosiale og kulturelle interesser. Hald fram med å lese «Godt humør i eldrelaget»

Steinblokker store som hus

Største utfordringa. Oppi her er det slepper, store som hus, og vegvesenet er redd for at heile vegbana rasar ut når ein skal sprengja seg ned 35 meter. Når stengjeperioden er over rundt 1. april, skal vegen atter vera køyrande, sjølv om noverande veg forsvinn.
Største utfordringa. Oppi her er det slepper, store som hus, og vegvesenet er redd for at heile vegbana rasar ut når ein skal sprengja seg ned 35 meter. Når stengjeperioden er over rundt 1. april, skal vegen atter vera køyrande, sjølv om noverande veg forsvinn.

Steinblokker så store som hus – 20-30 meter rett over vegbana –  som på si side har svært dårleg fundament. Det er hovudgrunnen til at riksveg 13 vert stengd i fem nye veker frå 27. februar.

Av Johannes H. Sekse

Truleg er det ein del resignasjon som gjorde at det var ein del færre som møtte for å få informasjon om rassikringsprosjektet Deildo på Sekse tysdag, enn sist. Men temperaturen var langt høgare.

Dagleg leiar i entreprenørfirmaet Contexo, Knut Brusletto, var ein av dei som forklarte bakgrunnen for at ein ikkje kjem forbi ei ny lang stengjing. For å ta ned det 35 meter høge partiet ute mot Geithamrane, må ein dela det opp i tre omganar. Og ein har ikkje garanti for at vegen vert ståande, eller om han ryk med.

For å vera sikre på at ein har køyrande veg etter nedsprengjinga, treng ein fem veker.

Inge Haustveit - HMS-ansvarleg.
Inge Haustveit – HMS-ansvarleg.

Tryggleiken kjem framfor alt anna – både for dei som arbeider der, og trafikkantane, understreka mellom andre Inge Haustveit, som er regionalrådgjevar for HMS og Bergsprenging for heile Vestlandet.

Sølv om fjellgrunnen har litt ulik samansetjing i sør og i nord i det tre km lange anleggsområdet, har det ein ting til felles. Det er uvanleg utfordrande. Bak den berykta Osten, viste det seg at fjellet var endå verre. Til vanleg kjem ein til betre fjell til lenger inn ein kjem.  Her er det omvendt.

Overraska geolog - Harald Hauso
Overraska geolog – Harald Hauso

Kor langt ein må inn før det vert betre fjell, visste knapt «Gudane», sa geolog Harald  Hauso, som kalla Osten for sukkerbitfjell med mykje slepper. Her er sprekker både med fall innover, og som lagar overheng og ut mot fjorden, og slepper som hallar innover med fare for utgliding.

«Me visste det var dårleg, men. Ja! Eg er overraska, sa han på direkte spørsmål

«Når realiteten er slik han er, hadde me ikkje noko anna val enn det som er gjort. Lang tunnel ville nok vorte veldig lang», sa han og avviste det som noko alternativ.

Ordstyrar og  prosjektleiar, Terje Dagsetad fraus ikkje direkte under den oppheta spørjerunden på slutten.
Ordstyrar og prosjektleiar, Terje Dagsetad fraus ikkje direkte under den oppheta spørjerunden på slutten.

Prosjektleiar Terje Dagestad karakteriserte det heile som det mest kompliserte veganlegget på heile Vestlandet.

Litt utom elva Deildo er det eit parti med fjell som er så laust at du kan «garva det ut for hand», sa Hauso. Her har entreprenøren bora inn totalt 15 km med stag på ei strekkje på berre 500 meter!

Både Hauso, Haustveit, Brusletto, byggjeleiar Terje Nesse og sjølvaste seksjonssjef for Voss og Hardanger, Lars Øyre, bad om forståing for at dette tek tid og at dei er nøydde til å ha ei ny totalstengjing.

Lars Øyre vil fylgja opp ein del av kritikken men ikkje imøtekoma krav om erstatning.
Lars Øyre vil fylgja opp ein del av kritikken men ikkje imøtekoma krav om erstatning.

Det skjer frå måndag 27. februar til ut mars månad. Opplegget vil verta som sist – med gratis båtrute og ekstra ferjeavgangar. Men nokon komppensasjon for ekstrautgifter ville ingen gje – bortsett frå at båten er gratis.

Å erstatta øydelagde bilar på grunn av holete veg eller betonglsam, vart heller ikkje imøtekome. Men ein tok kritikk på at vegen har vore til dels svært holete.

-Det skal han ikkje vera, sa både Dagestad og Øyre, som bedyra at dei skulle skjerpa inn krava om det.

Det vart elles oppmoda om at trafikkdirigentane burde vera flinkare til å stua og plassera bilane i køen, slik at det går kortare tid når ein opnar. No har det gått opp i eit kvarter berre å få forbi køen frå den eine sida, vart det hevda.

Det vil ikkje minst vera viktig til sommaren att, då det er mykje større trafikk.

Dag Frode Opeddal og Tor Eivind Osmo var mellom dei hardaste kritikarane, og slett ikkje nøgde med alt som var sagt og gjort.
Dag Frode Opeddal og Tor Eivind Osmo var mellom dei hardaste kritikarane, og slett ikkje nøgde med alt som var sagt og gjort.

Det kom og eit par «haglbyer» om tilhøve med manglande toalett, for dårleg og misvisande informasjon og skilting. Slik det var sist opplevde ein at mellom anna utanlandske trailersjåførar måtte rygga fleire kilometer for å snu.

Det vart etterlyst blinkande ljos og informasjon på engelsk på ein del strategiske stader. Noko er gjort, men det er ikkje alltid så godt når blinkljosa vert stolne, sa Terje Dagestad. Til og med ei lykt som var sveist fast, hadde nokon skrudd innmaten ut av.

Gisle Røynstrand peika på manglande sikring langs kaien på Børve, og at det måtte koma på plass. Han hadde etterlyst det før, utan at det hadde hjelpt. Og han måtte ta litt ekstra i denne gongen og, før det vart bekrefta at det skulle skje.

Når vegen opnar rundt 1. april, etter fem vekers full stengjing, skal denne 35 meter høge fjellknausen vera senka til veghøgd. Børvehovden i bakgrunnen, litt innom andre enden av anleggsområdet.
Når vegen opnar rundt 1. april, etter fem vekers full stengjing, skal denne 35 meter høge fjellknausen vera senka til veghøgd. Børvehovden i bakgrunnen, litt innom andre enden av anleggsområdet.

Grunnen til at ein ikkje stengjer vegen alt no, er at det må gjerast ein del førearbeid før dei kan gå i gang med å sprengja det høge partiet i nord. Det skal mellom anna lagast såkalla pilotvegar for å koma opp med maskiner og utstyr. Og så skal det sikrast ein god del.

Som i fjor vert det og heilt ope i tre veker til sommaren. Og sommaren etter, skal det stå fram ein vel 3 km ny, breiare og ikkje minst sikrare veg.

 

Stengjer heilt i fem veker til

"Osten"  sett frå sør. Måndag morgon klokka halv ni vert trejdeparten smuldra sund i ei stor salve.

«Osten» slik han såg ut før den førre langstengjinga. No er det derimot i andre enden det skal sprengjast og sikrast. (Arkivfoto).

Frå 27. februar og fem veker fram, vil Rv13  atter verta heilt steng ved Deildo. Båtrute vert sett inn og ein vonar på fleire ferjeavgangar, som sist. Denne infoen fann me på heradet si heimeside. 

Rv.13 forbi Deildo i Hardanger må stengast i fem veker. Nok eit høgt fjellparti skal sprengjast ned i samband med rassikringsarbeidet på strekninga.

-Av omsyn til tryggleiken for vegfarande og anleggsarbeidarane er det naudsynt å stengje rv.13 forbi Deildo i fem veker i mars, veke 9-13, fortel byggjeleiar Terje Nesse. Tysdag 24. januar inviterer Statens vegvesen til informasjonsmøte om vegstenginga. Møtet vert halde i Sekse Barnehage klokka 18.

TRE OMGANGAR. "Osten" må takast i tre omgangar, sa byggjeleiar Terje Nesse.
TRE OMGANGAR. «Osten» må takast i tre omgangar, sa byggjeleiar Terje Nesse på det førre møtet. No er det det høge partiet i nord, som skal redusertast og sikrast. (Arkivfoto).

Same veg var også stengd mot slutten av 2016, då ein sprengde ned fjellpartiet kalla for «Osten». Denne gong er det eit parti like sør om Geithamrane som skal takast ned.
-Skjæringa er om lag 30 meter høg på det høgaste. Vi veit ikkje omfanget av sikringsarbeida som må utførast før trafikken kan passera forbi staden. Sikringsarbeida må utførast frå vegbana, noko som gjer det umogleg å ha trafikk forbi staden, opplyser Nesse.

Som sist vert det sett inn hurtigbåt mellom Lofthus og Børve i den tida vegen er stengd. Rutetabellen vert truleg den same. Statens vegvesen arbeider også med å få sett inn fleire avgangar i ferjesambandet Kinsarvik-Utne i same periode.
Når vegen likevel er stengd vil entreprenøren nytte høvet til å få unna  anna arbeid som er vanskeleg å få til medan det er trafikk på vegen.
Kontaktpersoner:
Terje Dagestad
Prosjektleiar
Terje.dagestad@vegvesen.no
46836315

eller

Terje Nesse
Byggjeleiar
terje.nesse@vegvesen.no
90470780

Grannabryggjo

Mandag var ein stor dag for Indre Austsio og Grannabryggjo.

prosjektskisse

Eit langvarig dugnadsprosjekt har begynt å bera frukter. Gjensidigestiftelsen overrekte i eit godt regissert opplegg i Grannatun ein sjekk på kr 500 000,-. Det er vel det ein kallar som lyn frå klar himmel. Men desto meir overveldande.

Marie Opheim sa at dette var akkurat det prosjektet dei hadde venta på. Ein flott og velfundert søknad med alle momenter som dei ser etter i ein slik prosess. Alle godkjenningar var på plass. Full honnør til leiaren i Grannabryggjo, Siv H Haukelidseter, som har laga søknaden.

Prosjektskissa som er vist her er Anve Tveit sitt prosjekt. her ligg det utruleg mykje arbeid bak. Det er denne skissa som ligg i bonn for det me arbeider med.

Karl Arvid Andersen

IAG

Handbrygg fekk føter å gå på

Det vart rift etter dei 30 «samle»-kassane til det nystarta ølbryggeriet på Børve, då dei opna for sal over disk tysdag ettermiddag.

 Av Johannes H. Sekse

Stig Atle Meland var fyrste kunde og sikra seg nokre eksemplar av samlekassen med ulike øltypar.
Stig Atle Meland var fyrste kunde og sikra seg nokre eksemplar av samlekassen med ulike øltypar.

Stig Atle Meland gliste godt, då han med ein kasse i kvar hand, kunne slå fast at han hadde sikra seg souvenirar med flytande innhald. Deretter seig det på, både med lokale kundar, og litt meir langvegsfarande.

Medan Karl-Magnus Andersen er i innspurt med joletresal i Bergen, var det dei tre andre medeigarane i Hardanger Handbryggeri, Petter Sexe Ulriksen, Johannes Solheim og Magnus Steigedal som stod for salet denne fyrste dagen.

Jon Arne Meland gjorde godt innhogg, då han som ein av dei fyrste kundane fekk sleppa til. Her hjelpt av Johannes Solheim og Petter Sexe Ulriksen.
Jon Arne Meland gjorde godt innhogg, då han som ein av dei fyrste kundane fekk sleppa til. Her hjelpt av Johannes Solheim og Petter Sexe Ulriksen.

Den såkalla samlekassen var berre laga i 30 eksemplar, og gjekk fort unna. Han inneheldt dei fem basisølsortane og det nye jolaølet deira, fint dandert i svidde trekassar med ein dasj turrhøy frå ein gard på Sekse og ein liten brakekvist – eller –dusk, som ho Ingrid Espelid ville ha sagt det.

Geir Sekse betalte med kort.
Geir Sekse betalte med kort.

Det ligg to års planlegging, tenkjing, prøving og feiling, byråkrati, investeringar, svevnlause netter bak, når dei endeleg kunne opna dørene. Dei fire har til saman 40 års røynsle med brugging. På trass av fire  ulike utgangspunkt og ei rad idear og meiningar om korleis øl skal smaka, tok dei til slutt Hardangertradisjonen på alvor, som dei sjølve uttrykkjer det.

God stemning i lokalet medan folk venta på tur.
God stemning i lokalet medan folk venta på tur.

Mellom anna er det silt gjennom brakje, som set sin eigen smak på brugget. Heile prosessen, frå dei meltar kornet til dei set på etikettane, vert gjort for hand. Det seier seg difor at det er ein arbeids- og tidkrevjande produksjon.

Som med frimerkesamlarar, er det kan henda at nokon av dei som kjøpte fyrsteutgåva med øl frå Børve, kjem til å plassera det saman med eventuelt andre i ei eiga samling.

Men for mange, vert det truleg berre flaskene som overlever. Og skulle nokon gå tomme, vil det vera  ope for sal kvar torsdag. Ølet er elles alt å få tak i i butikkane, der det alt har vorte godt motteke.

Mellom anna skal det ha vore nokon samlarar som køyrde eins ærend frå Haugesund til Tyssedal for å sikra seg nokon flasker av det nye Hardangerølet.

Kari vann namnekonkurransen

Kari Svåsand fekk premie for namnet på joleølet. - Nemleg "Potlaskatt".
Kari Svåsand fekk premie for namnet på joleølet. – Nemleg «Potlaskatt».

Pilsen til Hardanger Handbryggeri heiter «Tyst», sterkølet «Haarteigen» og mørkølet «Bek». Men kva skulle dei kalla joleølet?

Då dei starta fyrste koko si med det, lyste dei samstundes ut ein namnekonkurranse. Det kom inn fleire forslag. Den som gjekk til topps, var Kari Svåsand. Ho føreslo «Potlaskatt».

Ho var særleg invitert til opninga, og fekk ein fin premie og takk.