Me ynskjer å levandegjera nettsida vår. Målet er at folk skal finna noko nytt nesten heile tida. Til det treng me også di hjelp!
Me i redaksjonen i «Grannanytt» og nettsida vår, kom saman for ei tid sidan. Me har alle vore travelt oppteke med mangt og mykje det siste halvåret. Men no satsar me på på ein «ny vår».
Me startar likså godt med namnet på nettsida. Sidan me kallar papiravisa vår for «Grannanytt» fann me ut at «Grannanett» var eit bra namn.
Her vil me leggja ut stoff etterkvart som me har noko å melda – antan det er noko nytt, eller noko kjekt og triveleg – eller begge deler.
Me ynskjer også å koma skikkeleg i gang med eit par galleri – eitt med gamle og historisk interessante bilete og eitt med dagsaktuelle glimt om ver, vind og andre motiv som folk er flinke til å gjera på Facebook.
Difor oppmodar me lesarane om å senda inn bilete. Så skal me leggja dei ut i galleriet.
Dei ulike laga og organisjonane er elles hjarteleg velkomne til å senda inn – eller sjølve leggja ut – stoff under sine eigne faner. Dei som ynskjer det, kan få opplæring, så dei kan gjera det sjølve. Elles hjelper me gjerne til med å leggja ut.
Styret har arbeidd med å få tak i tilstrekkeleg med steinmassar og plastringsstein for å koma vidare i prosessen.
Brødrene Kråkevik har køyrt plastringsstein til oss frå fjellhallane på Boliden. Massane får me gratis, men det er transporten som kostar.
Me er no i dialog med fleire for å få tak i meir massar og reknar med at me innen kort tid har ei løysing på det. Dessverre har me ikkje fått meir massar frå Deildo. Heradet har prioritet der og har no fått mykje massar til sentrumsområdet på Lofthus.
Ei stor gravemaskin kjem på plass på nyåret. Då startar Stig Hesjedal med plastring av piren . Deretter skal landområdet bearbeidast. Då skal det verta parkeringsplass, gang-og sykkelveg og friområde bort mot badestrand.
Bygget som er planlagt i båthamna vil verta eit frittståande prosjekt når området elles er klart. Sjølve tomte til bygget vil verta planert så langt det let seg gjera og så er me avhengige av endå meir stein til utfylling. Dette vil verta eit felles bygdeprosjekt som krev både midlar og dugnadsinnsats.
Fundamentet som er bygd på dugnad ytterst på piren vert inngangsporten til båtplassane. Grannabryggjo er no i dialog/forhandlingar med 3 leverandørar av utstyr til etablering av båtplassar. Dette er Marina Solution i Ørsta. Marinegruppen på Tysnes og Vik-Ørsta , også dei etablert i Ørsta. Me har i samarbeid med dei kome fram til ein annan modell enn den me fyrst såg for oss. Styret har og vore på befaring på fleire båtanlegg, bl.a i Strandebarm og Granvin. Me kan då byggja vidare på erfaringar derifrå og har sett kva løysingar dei har gått for.
Det vert eit krevande prosjekt økonomisk og det er pr. i dag selt 35 båtplassar. Me har plass til 50 båtar totalt i annlegget. Til fleire me får seld til rimelegare vert kvar båtplass. Når alle plassane er seld vil nok verdien på desse berre auka framover.
Prisen pr plass avheng av kor stor båt du har tenkt å ha. Dei rimelegaste plassane vil disponera omlag 2 meter. Deretter prisar me pr 10 cm ekstra fram til den breidden folk ynskjer.
Me oppmodar alle dei som går med draumar om eigen båt å ta kontakt med styreleiar Terje Mala eller Randi Selvåg Fresvik som kan gjera avtalar om båtplass.
Me treng og nye medlemmer i Grannabryggjo. Som medlem vil du vil kunna ta del i utviklingen av området og har same rettigheitane som båteigarane. Båtplassen kan eventuelt koma seinare.
Dette vert eit flott prosjekt og ikkje minst ei trygg hamn for båtane. Bryggene vert tilrettelagt med straumsøyler og vannpostar. Det kjem til å verta eit nytt landemerke for bygdane våre. Det vert og ein samlingsplass der båteigarar og andre kan samlast over ein kaffikopp i maritimt miljø.
Grannabryggjo har og meld seg inn i : Kongelig Norsk Båtforbund (KNBF)
Som er Norges største og einaste landsdekkende interesseorganisasjon for fritidsbåtbrukarar. Her vil me og få gode forsikringsordningar og medlemsfordeler for båteigarane.
IAG har vorte oppmoda om å arbeida for lågare fartsgrense over FV 101. Har vore i kontakt med statens vegvesen. Å få nedsett fartsgrense er ein møysommeleg prosess. Det har vore ein forståing av at oppheving av 30 grense tyder automatisk overgang til 80 km/t.
Oppheving av 30 km/t grense i Flisabakken
Har googla litt eg og klypt ein reportasje i Trønderavisa.
» På veg sørover mot Melhus sentrum, etter lysreguleringa ved Meeggen står dette skiltet. Hvilken fart kan du kjøre i? 80? 50? 40? «
Videre står det i teksten :
Forbudskiltet «Fartsgrense opphevet» er en luring i skiltjungelen. Her er fakta for ikke å bli lurt: Når 30- og 40-sone oppheves er den gjeldende fartsgrensa 50 kilometer i timen. Alltid. Når 50-, 60- eller 70-sone oppheves blir fartsgrensa 80. Reglene er krystallklare.
Som kjent har Hordaland fylke 2 millionar kroner til vegljos over Sekse.
I dag er det ein og annan stolpe med ljos i langs Seksevegen, medan lange strekkjer er kolsvarte. No forventar ein at noko vil skje.
Mange lurer no på kva som skjer og kva tid ljoset kjem. Ikkje minst no når haustmørkret alt har gjort sitt inntog.
I dette brevet (nedanfor) skriv teknisk sjef Helga Helleland at arbeidet må lysast ut på tilbod, men at det skal koma i gang i løpet av 2017. Så reknar me med at det snart er nokon som set spaden i jorda.
Etter ein liten stillstand er Stig Hesjedal no i gang med plastring av pir. Me har fått ein gunstig avtale med Brødrene Kråkevik. Dei har sett ei stor maskin her som me betalar for dei timane me brukar.
Stig startar her plastring på pir.
Her er plastingssteinane såvidt synlege. Steinane er lagt ned på meir enn 2 meter under fjæra sjø. Stig har innretta arbeidstide si etter fjøra sjø. All honnør for det.
Alle har sikkert fått med seg at det er kome mykje stein og massar ned til Grannabryggjo.
Karl Magnus Andersen på Midt Sekse donerte heile steinrøyse si til prosjektet. All steinen som no er kome ned kjem derfra. Me trefte midt i ein regnversperiode slik at veien hans vart heilt nedkjørt, men ved hjelp av Br. Kråkevik, Frode Sekse og ein god dugnadsgjeng vart alt i skjønnaste orden etterpå. Takk for flott innsats ! No ser me framover til neste økt.
Grannabryggjo sett nordover
Her er det laga ny veg ned i sjøkanten. Ytterst på den vesle trebryggja mot nord i biletet skal muren sørover mot piren starta. Steinen som ligg her skal nyttast til plastring/muring.
Piren og landfylling
Her ser me piren som no er ferdig fylt. Det er midlertidig lagt stein på kantane.Ferdig pir vert forlenga med ca 7-8 m ved å leggja opp stein ytterst. Frå ytterkant av pir skal det monterast bølgebrytarar nordover. På innsida av bølgebrytarane vert det utliggjarar til båtar.
Det er påbegynt fylling i «kroken» innerst ved pirfoten. Dette skal vera fundamentet til bygningar som bl.a. skal romma kajakksenter.
Steinmassar plassert på begge sider av veg ned mot sjøen
Steinmassane langs vegen nordover skal nyttast til plastring i strandlinja frå liten trekai bort mot pir.
Langs denne plastringen i sjøkanten skal det byggjast trekai som gangvei langs sjø og den skal og ha utliggjarar til båtar.
Me satsar på å ha på plass gravemaskin til plastring i juni.
Me oppfordrar alle som har, eller veit om noken som har steinmassar og/eller plastringsstein å melda frå til leiaren i Grannabryggjo som er Terje Mala.
Eit samrøystes Utval for miljø og samferdsel i Hordaland har løyvt 2 millionar kroner til vegljos langs Seksevegen.
«Dette er det største som har skjedd sidan IAG vart skipa», seier styreleiar i Indre Austsio Grannalag, Karl Arvid Andersen. Vegljos over Sekse har vore etterlyst av både foreldre og turgåarar i fleire tiår.
– Vegljos var også ei av dei viktigaste av alle dei gode sakene som IAG skulle fronta, då laget vart skipa for nokre få år sidan. Og som me no faktisk har fått til, seier han.
Karl Arvid Andersen, flankert av nestleiar Hildegunn Espe til venstre ogkasserar Irèn L. Knutsen. (Arkivfoto)
Vedtaket inneber 2 millionar kroner i inneverande år – til 100 ljospunkt fordelt på den 2,5 kilometer lange fylkesvegen frå Hovland til Sandstå. Vedtaket er i tråd med tilråding frå Trafikksikringsutvalet i Hordaland.
Politisk starta prosessen med at Petter Sexe Ulriksen tok saka opp for tre-fire år sidan. Men så verka det som om saka ikkje kom vidare. IAG tok opp tråden i 2014, og har etter det arbeidd kontinuerleg for å få hol på byllen, som Andersen uttrykkjer det.
Varaordførar Kåre Grønsnes, fekk seinare samrøystes vedtak i Plan- og ressursutvalet, om at prosjektet skulle prioriterast på topp i heradet sin plan over trafikksikringstiltak på fylkesvegar.
Etter det arbeidde IAG med å påverka samferdselskomiteen i fylket. Fyrst via Einar Lutro som då sat i der. Seinare la dei press på ordførar Solfrid Borge. Ho på si side har hatt mange samtalar med komiteleiaren i fylket, Nils Bjørke.
Karl Arvid Andersen rosar både Borge og Grønsnes for innsatsen deira i prosessen. Den 31. mars i år sende heradet søknad om midlar til gateljos, og ein knapp månd etter det, vart det altså gjort positivt vedtak om å løyva pengar til det lenge etterlengta prosjektet.
– Dette må vel vera ei skikkeleg gladsak, seier styreleiar i Indre Austsio Grannalag, Karl Arvid Andersen. Det er utruleg mange som nyttar Seksevegen til å gå tur eller trimma. I tillegg er det skuleveg og veg til og frå aktivitetar i grenda.
Me legg og til at Seksevegen fekk nytt asfaltdekke i fjor haust.
Quiz- eller kviss’en etter årsmøtet i IAG, vart eit kappløp med små marginar.
Vinnarlaget.
Anve Tveit og Johannes H. Sekse hadde laga ein kviss som sette både lokalkunnskap og andre eigenskpar på prøve.
I alt seks lag kjempa om fyrsteplassen. Etter to omgangar viste det seg at «Benkabyggjarane» fekk 30 poeng, som var bortimot full pott.
Like bak kom «Frysekrokjen», som fekk varmen opp i andre omgang, og enda på 28,5. «NedstaSekse» kom på tredje med 27, «Vinnarlaget» fekk 25,5, «Borte bra men heima best», 23 og «Sekse Velforeining», 21,5. Sjokolade som premie gav truleg meirsmak.
Årsmeldinga til Indre Austsio Grannalag er ei imponerande liste over stor aktivitet.
Liear Karl Arvid Andersen, nestleiar Hildegunn Espe og resten av styret kan visa til ein imponerande innsats og mange gode resultat det siste året.
Dei viktigaste sakene i 2016 har vore småbåthamn/aktivitetespark, bustadfelt, kommunereforma, avtale knytt til barnehagen og vegljos over Sekse. Her er lagt ned ein imponerande dugnadsinnsats på alle plan.
Medlemstalet auka også med 29 til 312 medlemmer ved årsskiftet. Årspengane vert framleis 100 kroner for både enkeltmedlem og heile familiar.
Anve Tveit har laga 2 nye benkar. Den eine har stått på kaien på Børve, og ein skal plasserast i eit høveleg tun på Sekse
Økonomien er på rett veg. Laget hadde vel 112.000 kroner på konto ved årsskiftet. Men store prosjekt og tilsvarande utgifter gjer at det må søkjast støtte både her og der også i året som kjem.
«Viss du deltek får du vera med og bestemma! Folk må ha tru på at dei skal vinna!»
Ragna Flotve
Dette og mykje anna kom Ragna Flotve frå Landbruksavdelinga til Fylkesmannen i Hordaland inn på då ho inspirerte årsmøtet i Indre Austsio Grannalag. Ho oppmoda folk til å tenkja kreativt og konstruktivt og ha tru på eigne krefter og ressursar .
Av Johannes H. Sekse
«Levande bygder» var temaet hennar, og grunnlaget for nettopp det, er at flest mogeleg engasjerer seg.
«Antan er me med, eller så er me det ikkje», sa ho. Viss du deltek i lokalsamfunnet rundt deg, får du også vera med og bestemma. Difor hadde ho gjerne sett fleire, og ikkje minst fleire unge i salen denne kvelden. Hald fram med å lese «Inspirerte grannalaget»
Eit samrøystes Utval for miljø og samferdsel i Hordaland har løyvt 2 millionar kroner til vegljos langs Seksevegen.
